Wednesday, February 22, 2012

కొందరు ఔత్సాహిక విద్యార్ధులు నిర్మించిన లఘుచిత్రం లోని పాటలు..


 విశాఖపట్నంలోని గీతం యూనివర్సిటీ లో ఇంజినీరింగ్ చదువుతున్న కొందరు ఔత్సాహిక విద్యార్ధులు నిర్మించిన లఘుచిత్రం లోని పాటలు ఈ క్రింది ప్లే బటన్ నొక్కి వినండి. విన్నాక మీ అభిప్రాయం చెప్పడం మర్చిపోకండి..!



పాట పాడింది మా కజిన్ కిరణ్. పాట ట్యూన్ చేసింది కూడా తనే..!! 
అయితే బ్యాక్ గ్రౌండ్ మ్యూజిక్ ఎవరిచేతో చేయించారట. 

'తీరం' అనే పేరుతో తీయబడిన ఆ లఘుచిత్రం చూడదలిస్తే ఈ క్రింద చూడొచ్చు. దాని నిడివి సుమారు 30  నిమిషాలు. 


(పాటల ఆడియో లింకులు మరియు వీడియో 'తీరం' టీం సౌజన్యంతో...)  

పూర్తిగా చదవండి...

Tuesday, February 21, 2012

శ్రీ ఆర్ శంకర్ వ్రాసిన కవిత : స్నేహం


మా అన్నయ్య శ్రీ ఆర్ శంకర్ వ్రాసిన కవిత : స్నేహం
(సవరణలు, సూచనలకు  ఆహ్వానం)

కుల మతాలకతీతమై 
మనసులలో మమేకమై
మాధుర్య సుగంధాలను
విరాజిల్లే పరిమళ పుష్పం స్నేహం

బంధాలను బంధుత్వాలను
చిన్నా పెద్ద తారతమ్యాలను
అధిగమించిన మానవుని
మానస పుత్రిక స్నేహం

నా అన్నవారు లేని సమయాన 
నేనున్నానన్న భరోసా ఇచ్చి
దాపరికాలకు తావులేదని చాటిన
అభయ హస్తం స్నేహం

హద్దులు ఎల్లలు ఎరుగని స్నేహం
విశ్వశాంతికి జనియించిన ఏకైక మూలకం
ఆదీ అంతం లేని శ్వేత వర్ణ కుసుమం
హృదయాంతర క్షేత్రం లో విరబూసిన ఆమని స్నేహం

కాలం కొలవలేని ఎన్నో వసంతాలను చూసి
భవిష్యత్తులో మరెన్నో వసంతాలను వీక్షించే
చక్కటి అనుభూతి స్నేహం..

అపార్ధాలూ అపోహలూ
తాత్కాలికమే అని హితవు పలికి
ఆచంద్ర తారార్కం నిలిచేది స్నేహం..
పై కవితకి కి నేను చేసిన సవరణలు..
కుల మతాలకే అతీతమై
మనసులతో మమేకమై
సుగంధ మధురిమల్ని పంచే
పరిమళ పుష్పం స్నేహం..

బంధాలూ బంధుత్వాలన్నీ
చిన్నా పెద్దా తేడాలన్నీ
అధిగమించిన మానవుడా
నీ మానస పుత్రిక స్నేహం

నాఅన్నవారే టోకరా ఇస్తే
నేనున్నానని భరోసా ఇచ్చి
దాపరికాలే వద్దని చాటే
అభయ హస్తం స్నేహం..

హద్దులు ఎల్లలు ఎరుగని స్నేహం
విశ్వశాంతి కేకైక మూలకం
ఇక్కడినుంచీ నాకు సవరణలు తట్టలేదు. అందుకే యధా తథంగా ఉంచేశాను.
ఆదీ అంతం లేని శ్వేత వర్ణ కుసుమం
హృదయాంతర క్షేత్రం లో విరబూసిన ఆమని స్నేహం

కాలం కొలవలేని ఎన్నో వసంతాలను చూసి
భవిష్యత్తులో మరెన్నో వసంతాలను వీక్షించే
చక్కటి అనుభూతి స్నేహం..

అపార్ధాలూ అపోహలూ
తాత్కాలికమే అని హితవు పలికి
ఆచంద్ర తారార్కం నిలిచేది స్నేహం..
మిత్రులెవరైనా ఇంకేమైనా సలహాలూ సూచనలూ ఇవ్వదలిస్తే వారికి మనఃపూర్వకంగా స్వాగతం పలుకుతున్నాం.  

పూర్తిగా చదవండి...

Monday, February 20, 2012

కొన్ని ప్రసిద్ధ శివాలయాల ఈ-దర్శనం


బ్లాగు మిత్రులందరికీ మహాశివరాత్రి పర్వదిన శుభాకాంక్షలు
***************************************************
(మీరేప్పుడైనా రామేశ్వరం లోని రామనాధేశ్వర స్వామి ఆలయం చూసారా..?? తిరువణ్నామలై లోని అరుణాచలేశ్వర స్వామి కోవెల..?? బోల్డు తంటాలు పడి వెళ్ళినా మన గైడు పెట్టే హడావిడి వల్లనో, దృష్టి పిల్లలమీద వుండడం వల్లనో, ఏదో చూసామనే తప్ప ఆ శిల్పకళని తనివితీరా చూడలేం. కొన్నిచోట్ల క్యు లైన్ల కోసమో, శిల్పాలు ముట్టుకొంటే పాడైపోతాయనే భావనతో బారికేడ్లు కట్టడం వల్ల దగ్గరగా వెళ్లి చూడలేం. ఇవన్నీ మన కళ్ళ ముందు మన కంప్యూటర్ లో దర్శన మిస్తే..!! మనం ఏ డిటైల్ కావలిస్తే దానిని జూమ్ చేసి చూసుకో గలిగితే..!! అద్భుతంగా వుంటుంది కదూ..!!
View360, చెన్నై వారు మనకి ఆ అవకాశాన్ని కలిగిస్తున్నారు. తంజావూరు లోని బృహదీశ్వరాలయం లో నిలబడి మనం తలతిప్పి కుడి, ఎడమలకూ, ముందూ వెనుకలకూ, అలాగే తల ఎత్తి పైకీ, మన కాళ్ళదగ్గర నేలనూ కూడా చూడగలం. తమిళనాడులోని ప్రసిద్ధ దేవాలయాలూ, చర్చిలూ, కోటలూ, రాజభవంతులూ, అభయారణ్యాలూ జలపాతాలూ మొదలైనవి 360 డిగ్రీలు చూడగలిగేలా రూపొందించారు. క్రింది జాబితాలో జాబితాలో ఏది చూద్డామనుకున్తున్నారో ఆ లింక్ ని క్లిక్ చెయ్యండి. వెంటనే ఆ దేవాలయం యొక్క
360 డిగ్రీ దృశ్యం కనబడుతుంది. ఇక ఫుల్ స్క్రీన్ చేసుకొని మౌస్ క్లిక్ చేసి అటూ ఇటూ తిప్పి మీకు కావలసిన దాన్ని జూమ్ చేసుకొని చూసుకోవడమే. ఎర్రటి బాణం గుర్తు మిమ్మల్ని ముందరకు తీసుకుపోతుంది. ఎడమ ప్రక్క మాప్ కూడా వుంటుంది. నావిగేట్ చేస్తూ పోవడమే..!!)
మహాశివరాత్రి సందర్భంగా కొన్ని ప్రసిద్ధ శివాలయాల ఈ-దర్శనం చేసుకుందాం రండి.
 
  బృహదీశ్వరాలయం-గంగైకొండ చోళపురం  (ఈ లింక్ నొక్కండి) 
 

బృహదీశ్వరాలయం-తంజావూరు  (ఈ లింక్ నొక్కండి) 


తిరువణ్నామలై లోని అరుణాచలేశ్వర స్వామి కోవెల  (ఈ లింక్ నొక్కండి) 

 కుంభకోణం నుంచీ మూడు కి.మీ. దూరం లోని ఐరావతేశ్వరాలయం, ధారశురం  (ఈ లింక్ నొక్కండి) 



  విజయనగరంలో కొలువుతీరి వున్నశ్రీ పశుపతినాధేశ్వర స్వామి ఆలయ విశేషాలను, ఫొటోలనూ ఈ లింక్ నొక్కి చూడండి.

శ్రీ పశుపతినాధేశ్వర దర్శనం  (ఈ లింక్ నొక్కండి) 

తమిళ నాడులో ఉన్నమరికొన్ని దేవాలయాలూ, దర్శనీయ స్థలాలూ ఈ క్రింది లింక్ నొక్కి చూడండి.
http://view360.in/portfolio.html

ఇదివరకు నా బ్లాగ్ లో ఇదే విషయం పైన వ్రాసిన పోస్టు :
తమిళనాడు దర్శన్..(ఖర్చు, శ్రమ లేకుండా) view360 .com వారి సౌజన్యం తో
 
నమః పార్వతీ పతయే హర హర మహాదేవ శంభో శంకర

పూర్తిగా చదవండి...

Wednesday, February 15, 2012

కార్టూనిస్టు కేశవ్ గారు గీసిన కారికేచర్స్ (గుర్తు పట్టండి చూద్దాం)

సాధారణంగా మనం రోజూ పేపర్లలో రాజకీయ నాయకుల కారికేచర్లు చూస్తూ ఉంటాం. వారి నడకనో, ఆహార్యాన్నో, శరీర నిర్మాణంలో ప్రస్ఫుటం గా కనిపించే అంశాన్నో తీసుకొని కార్టూన్లూ, కారికేచర్లు గీస్తూ ఉంటారు. ఇది నిజంగా అద్భుతమైన కళ. అతితక్కువ గీతలతో పైన చెప్పిన అంశాలు ప్రతిబింబించేలా బొమ్మ గీయడం, అది చూడగానే ఆ వ్యక్తి గుర్తుకొచ్చేలా చేయడం పైకి కనిపించేటంత సరళం కాదు. ఎంతో సాధన చేస్తేనే గానీ ఈ రంగం లో గుర్తింపు రావటం చాలా కష్టం. 

శ్రీ కేశవ్ గారు ప్రముఖ జాతీయ దిన పత్రిక ది హిందూ లో కార్టూనిస్టుగా అందరికీ చిరపరిచితులే. ఈరోజు వారి బ్లాగు కంటపడింది. బ్లాగులో వారు రోజూ గీస్తున్న కార్టూన్లే కాక ప్రముఖ సంగీత విద్వాంసుల కారికేచర్స్ గీసి వాటిని ఇంకొక బ్లాగులో విడిగా పెట్టారు. ఈ రకంగా సంగీత విద్వాంసులను కారికేచర్స్ రూపం లో గీయడం ఒక సాహసమనే చెప్పాలి. బహుశా ఇలా గీసినది, (పైగా ఇంతమందిని) శ్రీ కేశవ్ గారు ఒక్కరే అయివుంటారు. వీటిలో ఎక్కువ మట్టుకు ఆయా విద్వాంసులు కచ్చేరీ చేస్తూ వుండగా గీసినవే నట.



ఏ ఆర్ రహమాన్ 
పైన ఉన్న పన్నెండు మంది వ్యంగ్య చిత్రాలు చాలా ప్రముఖులైన సంగీత విద్వాంసులవి. శాస్త్రీయ సంగీతం తో అంతో ఇంతో పరిచయం ఉన్నవారికి ఇవి చూడగానే ఇట్టే తెలిసిపోతాయి.  మీరు గుర్తుపట్టిన వారి పేర్లను కామెంట్లలో వ్రాయండి. తెలియక పొతే నేనెలాగూ చెబుతాను. ఇప్పుడే కాదు. రెండు రోజులాగి...!! ఆగలేని వారి కోసం క్రింద శ్రీ కేశవ్ గారి బ్లాగు లింక్ ఉంచాను. దానిలో సుమారు డెబ్భై మంది విద్వాంసుల మీద శ్రీ కేశవ్ గారు పెన్ను చేసుకున్నారు. విద్వాంసుల కనుముక్కు తీరే కాక వారి కట్టు, బొట్టు, పాడుతున్నప్పుడు వారి హావ భావాలు మొదలైనవి చాలా బాగా చిత్రించారు. చూసి ఆనందించండి.

ఇంకో విషయం..!! మీరు ఈ పన్నెండు మందిలో 100 %  కరెక్టు గా చెపితే మీరు కర్ణాటక సంగీతంతో సహవాసం చేస్తున్నారన్నమాట. ఆరుగురి కన్నా ఎక్కువ అయితే పర్వాలేదన్నమాట. కొంచం శ్రద్ధగా చూస్తే గుర్తుకు రావచ్చు.
ఇద్దరి కన్నా తక్కువ చెప్పారనుకోండి.., మీకింకేమీ  చెప్పవలసింది లేదు... వారి బ్లాగ్ చూడమనడం తప్ప..!!

క్రింద శ్రీ కేశవ్ గారి బ్లాగులు మరిన్ని..!!
వారికి మనందరి తరఫునా శుభాభినందనలు.
పూర్తిగా చదవండి...

Thursday, February 9, 2012

ఈ మధ్య నేను చదివిన / చదువుతున్న పుస్తకాలు..

నా పుస్తకాల అలమర 
మధ్య నేను చదివిన / చదువుతున్న పుస్తకాలు

చదవటం పూర్తిచేసినవి :
  1. పండిత పరమేశ్వర శాస్త్రి గారి వీలునామా - గోపీచంద్
  2. క్లియోపాత్రా - ధనికొండ హనుమంతరావు
  3. పర్వ - ఎస్ ఎల్ భైరప్పగారి కన్నడ పుస్తకానికి అనువాదం
  4. వేయిపడగలు - విశ్వనాథ సత్యనారాయణ
  5. కౌంట్ అఫ్ మాంట్ క్రిస్టో - అనువాదం: సూరంపూడి సీతారాం 
  6. బెంగుళూరు నాగరత్నమ్మ జీవిత చరిత్ర - శ్రీరాం వి.
  7. ముక్కోతి కొమ్మచ్చి (ఒకటి, రెండు భాగాలు కూడా చదివేసాను) - ముళ్ళపూడి వెంకట రమణ
  8. The Alchemist - Paulo Coelho
  9. పరుసవేది - పై పుస్తకానికి తెలుగు అనువాదం
  10. హంస గీతం : చారిత్రక నవల - వివిన మూర్తి 
చదవటం మొదలుపెట్టి కొనసాగుతూ వున్నవి :
  1. భగవాన్ శ్రీ రమణ మహర్షి - చిక్కాల కృష్ణారావు
  2. శ్రీపాద రామాయణం - శ్రీపాద సుబ్రహ్మణ్య శాస్త్రి
  3. అనుభవాలూ - జ్ఞాపకాలూనూ - శ్రీపాద సుబ్రహ్మణ్య శాస్త్రి
  4. వంశీకి నచ్చిన కథలు - వంశీ
  5. వంశీ వెండితెర నవలలు : శంకరాభరణం, సీతాకోక చిలక, అన్వేషణ, శుభోయం కలిపి మొత్తం నాలుగు

  6. మహోన్నత మానవుడు - రాహుల్ సాంకృత్యాయన్
  7. Swamy and Friends - R K నారాయణ్
  8. Malgudi Days - R K నారాయణ్
  9. విష్ణు శర్మ ఇంగ్లీషు చదువు - విశ్వనాథ సత్యనారాయణ
  10. మా పసలపూడి కథలు - వంశీ    
కొని, చదవడం ఇంకా మొదలుపెట్టనివి :
  1. హంపి నుంచీ హరప్పా దాకా - తిరుమల రామచంద్ర
  2. కృష్ణవేణి - రంగనాయకమ్మ
  3. ఓల్గా నుంచీ గంగకు - రాహుల్ సాంకృత్యాయన్
  4. లోపలి మనిషి - పి వి నరసింహారావు
  5. టంగుటూరి ప్రకాశం : స్వీయ చరిత్ర
  6. భారతీయ తత్వ శాస్త్రం : 4 భాగాలు - డాక్టర్ సర్వేపల్లి రాధాకృష్ణ 
  7. ఆంధ్ర మహా సావిత్రి - శ్రీ అరవింద మహర్షి : అనువాదం శ్రీ శార్వరి 
  8. మొట్టమొదటి కన్యాశుల్కం - బం.గో.రె (ఇది 'కన్యాశుల్కం' నాటకం మాత్రమే కాదు. దానిలో ఉన్న జాతీయాలు, మాండలీకాలు, పద ప్రయోగాలను గురించిన వివరణలతో ఉన్న Collectors Edition)
  9. కాళీ పట్నం రామారావు రచనలు
  10. దేవదాసు, పల్లీయులు, షావుకారు : శరత్ నవలలు    
పూర్తిగా చదవండి...

Wednesday, February 8, 2012

వివేకానందుని పై కవిత : : రచన ఆర్. శంకర్


ఇది మా అన్నయ్య శ్రీ రుద్రావఝల శంకర్ స్వామి వివేకానందుని పై వ్రాసిన కవిత

నూట యాభయ్యవ జయంతి సందర్భం గా స్థానికం గా వచ్చే విజయభాను పత్రిక లో ముద్రించబడింది.

పూర్తిగా చదవండి...

Monday, February 6, 2012

పారిస్ లోని 'కరిగిపోతున్న భవనపు' రహస్యం :

మా  పారిస్  యాత్ర  విశేషాలు - 2
(ఒక విన్నపం: ఈ క్రింద ఉన్న ఫోటోలపై క్లిక్ చేసి పెద్దవిగా చూడండి.)
మేము పారిస్ లో దిగగానే అక్కడ ఉన్న భవంతులు, కట్టడాలలో ప్రఖ్యాతి చెందినవీ, చూడదగ్గవీఏమున్నాయో అని వెతుకులాట మొదలుపెట్టాం. అందరూ చెప్పినవి..: ఈఫిల్ టవర్, సీన్ నదిమీద విహారం, నోటర్ డాం చర్చి, ప్రపంచ ప్రఖ్యాత మోనాలిసా చిత్రం ఉంచబడిన మ్యూసియం, కాక-మనకుఅందుబాటులో ఉన్న కొంచం  సమయంలో చూడడానికి వీలుపడనన్ని మ్యుసియంలూ..! ఇలాకాదని గూగిలిస్తే కొన్నినిర్మాణాలు కనిపించాయి. వాటిలో నమ్మశక్యం కానంత గా మమ్మల్ని ఇంప్రెస్ చేసిన బిల్డింగ్ 'జార్జ్ వి'  అవెన్యూ లో ఉన్న ఈ భవంతి.










 ఫోటో చూడగానే మతిపోయింది. 'అసలు ఇలా కట్టడం సాధ్యమా..!!' అనిపించింది. పారిస్ లో చాలా మట్టుకు నిర్మాణాలన్నీ వెస్ట్రన్ క్లాసికల్ శైలిని అనుసరించి వుంటాయి. కానీ ఈ భవంతి శైలి మాత్రం అదే అయినా ఆ వంపులు తిరిగిపోయిన తీరు చూస్తే అలా కట్టగలగడం ఆశ్చర్యమనిపించింది. ఇదేదో 'ఫోటో షాప్' లో చేసిన కనికట్టా అంటే పక్క నున్న భవంతులన్నీ సరిగానే ఉండగా ఇదొక్కటే ఇలా ఎలా వుందో అర్ధం కాలేదు. పైగా రెండుమూడు ఏంగిల్స్ లోని ఫోటోలలో కూడా అది వంపులు తిరిగే ఉందాయే...!!   సరే ఎలాగూ అటే ('జార్జ్ వి' అవెన్యూ) వెళ్తున్నాం కదా అని దీనిని కూడా చూడాలని తీర్మానించుకున్నాం. 



అనుకున్నవన్నీ చూశాక సాయంత్రం అవుతుండగా ఇక్కడికొచ్చాం. ఆ చుట్టుపక్కల ఎంత తిరిగినా ఆ భవంతి కనబడలేదు. ఎంతో మందిని ముఖ్యంగా ఆ చుట్టుపక్కల షాపుల వాళ్ళని..! ఎవరినడిగినా మాకుతెలీదనే సమాధానం. పైగా ఎవ్వరూ ఫ్రెంచ్ తప్ప మాట్లాడరు. మనం ఇంగ్లీషులో ఆ బిల్డింగ్ ని వర్ణించి చెప్పి తెలుసా అని అడిగితే.. వాళ్ళు ముఖ ముఖాలు చూసుకొని.. మమ్మల్ని ఎగాదిగా చూసే వారు. ఆఖరికి ఆ రోజు మాకు దొరకలేదు.  ఇలా కాదని అనుకోని రూముకెళ్ళి మళ్ళీ గూగుల్ లోకి వెళ్లి అడ్రెస్స్ పట్టుకొన్నాం. అది నెం: 39, జార్జ్ వి అవెన్యూ, పారిస్.  

మర్నాడు పట్టువదలని విక్రమార్కుల్లా పొద్దున్నే బయల్దేరి మళ్ళీ జార్జ్ వి అవెన్యూ కి వెళ్లి 39 వ నెం ఇంటికి వెళ్లాం. ఈసారి సులువు గానే దొరికింది. కాని మమ్మల్ని నిరాశ పరుస్తూ ఆ బిల్డింగ్ మిగిలిన ఆని భవంతులలాగే తిన్నగానే వుంది. తేడాగా లేదు. అయితే 'అది' ఇదయ్యుండ దనుకొని మళ్ళీ తిరిగాం. లాభం లేక చివరకి ఆ బిల్డింగ్ లోనికే వెళ్లి చూస్తే ఆ రిసెప్షన్ కౌంటర్ బ్యాక్ డ్రాప్ గా మేము వెతుకుతున్న ఫొటోనే వుంది. ఆ రిసెప్షనిస్టుని వివరాలు అడిగితే ఆ అమ్మాయి రెండేళ్ళ క్రితం జాయిన్ అయ్యిందనీ.., అంతకుముందు ఆ బిల్డింగ్ లో Renovation Work జరిగిందనీ, ఆ ఫోటో ని బ్యాక్ డ్రాప్ గాఎందుకు పెట్టారో తెలీదనీ, చెప్పింది. మాకు నిస్పృహ వచ్చేసింది. అయితే ఆ బిల్డింగ్ ని కూలగొట్టి మళ్ళీ మామూలుగా కట్టేసి వుంటారనుకున్నాం. పోనీ ఆ renovate చేసిన ఆర్కిటెక్ట్ వివరాలు చెబితే పోనీ అతని తోటే మాట్లాడతామంటే కూడా వివరాలు చెప్పలేదు. ఇంకేం చేస్తాం..! ఆ ఉన్న బిల్డింగ్ కే ఫోటో తీసుకొని వెనక్కి వచ్చేశాం..!!


ఇండియా కి వచ్చేశాక గూగుల్ లో మళ్ళీ వెతికితే అప్పుడు తెలిసింది దాని అసలు రహస్యం. ఇంతకీ దాని అసలు సంగతేమిటంటే: ఆ బిల్డింగ్ ఓనర్ దానికి పెద్ద ఎత్తున రిపేర్ వర్క్ మొదలుపెట్టినప్పుడు.. మనకులాగా సిమెంటు సంచీలూ లేదా మెటల్ రేకులతో కట్టే పరదాల బదులూ, ముందు ఉన్న భవనానికి  (తిన్నగా ఉన్నదే సుమండీ..) ఫోటోలు తీసి, వాటికి ఈ రకమైన వొంపు సొంపులు సృష్టించి బిల్డింగ్ మొత్తం కవర్ ఐపోయే సైజులో  ప్రింట్లు తీసి తగిలించారు. తద్వారా బిల్డింగ్ ని ఏ మూల నుంచీ చూసినా పై ఫోటోలలో కనిపించే విధం గా కనికట్టు చేసారన్న మాట. బిల్డింగ్ Renovation పూర్తయిపోగానే ఆ తెరలు తీసేశారు. భలేగా ఉందికదూ..!! 
పైగా అది నిఝం గా నిజమే అనిపించటానికి కొన్ని డిజైన్ ఎలెమెంట్స్ ని నిజంగానే అలా కరిగిపోతున్నట్టుగా తయారు చేసి అతికించారు. అన్ని ఫోటోలనీ ఇంకోసారి పరీక్షగా చూడండి..! పైభాగం లో బాల్కనీలు, చూరు ఉన్నదగ్గర, కార్నర్స్ దగ్గర..! అర్ధం అవుతుంది..!!   
ఈ రకమైన కళని ఫ్రెంచ్ లో Trompe-l’oeil అంటారు. 
This building mural, Trompe-l’oeil, is an art technique involving extremely realistic imagery in order to create the optical illusion that the depicted objects really exist, instead of being just two-dimensional paintings. The name is derived from French for Trick the Eye, from tromper – to deceive and l’oeil – the eye.




వీడియోలో  పై బిల్డింగ్ ని చూడండి.




పూర్తిగా చదవండి...

Saturday, February 4, 2012

నా ప్యారిస్ యాత్ర విశేషాలు..


ఈమధ్య 9.11.2011 న హైదరాబాదులో బయల్దేరి దుబాయ్ మీదుగా ప్యారిస్ వెళ్ళాం. నేను, మా పార్టనర్ విజయ్, వాళ్ళ అన్నయ్య..మొత్తం ముగ్గురం. పారిస్ లో వారం, దుబాయ్ లో రెండురోజులూ వున్నాం,
అక్కడి ఫోటోలు కొన్నిఈ క్రింద చూడండి. వీలుని బట్టీ మరిన్ని విశేషాలు జోడించటానికి ప్రయత్నిస్తాను.   
'గ్రాండ్ ఆర్చ్'  అనే బిల్డింగ్ ఇది..
ఈఫిల్ టవర్ - ప్రక్కన మేము

మేము వెళ్ళిన Exhibition

డేవిడ్ అనే French Architect తో కలసి..! ఆయనతో మా పరిచయం ఇండియా లోనే..!! 
ఎంత ఎత్తుకి ఎదిగినా నీ మూలాన్ని మర్చిపోకు..!!


Seine River లో మా విహారం.. బోటు లో మేం ముగ్గురం..( ఎడమ నుంచి కుడికి విజయ్, వాళ్ళ అన్నయ్య EKL రావు, నేను)
Seine River లో మా విహారం..
సాయంసంధ్యలో  'ఐరన్ లేడీ' గా పిలువబడే ఈఫిల్ టవర్ 
ఈఫిల్ టవర్  నుంచి వివిధ నగరాల దూరాలు
ఈఫిల్ టవర్  నుంచి వివిధ నగరాల దూరాలు





La Geo de అనబడే స్టెయిన్ లెస్ స్టీల్ డోమ్ Parc de la Villette అనే సైన్స్ సిటీ లో వుంది. దానిలోపల ఒక IMax థియేటర్ వుంది.
 


Musée du Louvre - Louvre Museum ఇక్కడే ప్రపంచ ప్రఖ్యాతి గాంచిన మోనాలీసా పెయింటింగ్ ని భద్రపరచారు.

'మోనాలీసా' తో నేను..

Louvre Museum లోపల..!
గోడల మీద ఎన్ని బొమ్మలు వున్నాయో సీలింగ్ మీద కూడా అన్ని బొమ్మలూ, అంత గొప్పగానూ ఉన్నాయి.

జార్జ్ వి అవెన్యూ..

అమరవీరుల స్మృత్యర్థం నిర్మించిన Arc de Triomphe

#39 , జార్జ్ వి అవెన్యూ, పారిస్. దీని ప్రత్యేకత తెల్సుకోవాలంటే ఈ పిట్టకథ* చదవండి..!!
(*నా తరువాతి పోస్ట్)   

దుబాయ్ లో ఉన్న ప్రపంచం లోనే మొట్టమొదటి ఏడు నక్షత్రాల హోటల్..'బుర్జ్ అల్ అరబ్'. లోపల అంతా బంగారం తో  తాపడం చేసిన ద్వారాలూ, చూడ చక్కని ఫౌంటెన్లూ, లైటింగ్ ఎఫ్ఫెక్ట్లూ.. అద్భుతమైన అనుభవం..!!

ప్రస్తుతం ప్రపంచం లోకెల్లా ఎత్తైన టవర్..! పేరు బుర్జ్ ఖలీఫా..!! పైకెక్కడానికి  లిఫ్ట్ ఎక్కితే మనల్ని 124  వ అంతస్తులో దింపుతారు. అది ఎంత వేగవంతం అంటే  దానికి 124  వ అంతస్తు చేరటానికి పట్టేసమయం ఒక నిమిషం కన్నా తక్కువ.

(ఫోటోలు  అన్నీ మేము తీసినవే..!!) 

పూర్తిగా చదవండి...

మరిన్ని చక్కటి వెబ్ సైట్లు..!!

telugu (బ్యానర్ పై నొక్కి వెబ్ సైట్ కి వెళ్ళండి.)