Wednesday, January 25, 2012

విశాఖలో మంగళంపల్లి బాల మురళి కృష్ణ గారి మూడురోజుల కచ్చేరీ


విశాఖ సంగీతాభిమానులకు వీనుల విందు...! ఈ రోజు నుంచీ వరుసగా మూడు రోజుల పాటూ..!! బాలమురళి సంగీతామృతం లో ఓలలాడే అరుదైన అవకాశం విశాఖ నగర వాసులకు దక్కనుంది. కార్యక్రమం వివరాలు పైన వున్న  న్యూస్ ఐటెం పై నొక్కి  చదువుకోండి.
మరి ఇంకెందుకాలస్యం..?? తొందరగా ఇన్విటేషన్ సంపాదించి ఈ రోజు సాయంత్రం ఆరుగంటలకల్లా అక్కయ్యపాలెం దగ్గర  పోర్ట్  కళావాణి ఆడిటోరియం కి  వచ్చెయ్యండి.

ఇక సెలవు..!!

పూర్తిగా చదవండి...

Saturday, January 21, 2012

పరమపద సోపాన పటము

పరమపద సోపాన పటము :
వైకుంఠపాళి అని మన తెలుగువారికి సుపరిచితమైన ఈ ఆట ప్రపంచ వ్యాప్తంగా వేరువేరు పేర్లతో ప్రచారంలో వుంది. పేరులో ఏముంది కానీ ఈ ఆటని తెలియని వారుండరు. పైన చూపించిన బొమ్మ పెద్ద కాలండర్ సైజు లో మా చిన్నప్పుడు సంక్రాంతి, శివరాత్రి మొదలైన పండగలకు వీధిలోకి తెచ్చి అమ్మేవారు. అప్పట్లో బయట పుస్తకాల షాపుల్లో కూడా దొరికేవి. అప్పట్లో మేము గవ్వలతో ఆడేవాళ్ళం. చివరిసారిగా నేను ఈ పటాన్ని ఎనిమిది చదువుతున్నప్పుడు చూసాననుకుంటా. మళ్ళీ ఇన్నాళ్ళకు కనిపించింది.  అప్పుడు black&white  లో వుండేది. మేము ఇది కలర్ లో చూడలేదు.
ఇప్పుడు "పాములూ నిచ్చెనల" పేరుతో నేటితరం పిల్లలందరూ ఆడుతున్నారు. గూగుల్ లో దేనికోసమో వెతుకుతుంటే ఇది కనబడింది. 
ఈ ఆట యొక్క రూపకర్తలకు నిజంగా జోహార్లు. ఎన్నో విశేషాలు వున్నాయిందులో..! ఆట పేరు పరమపద సోపాన పటము. "పరమ పదం అంటే వైకుంఠం లేదా సద్గతి. తద్విష్ణోః పరమం పదం అనేది వేదోక్తి. దీని ప్రకారం విష్ణుమూర్తి ఉండే ప్రదేశమే పరమపదం." అంటే వైకుంఠం. పరమ పదం మానవ జీవిత లక్ష్యాన్ని నిర్దేశించే వేద ప్రమాణ వచనం. మోక్షప్రాప్తి తరువాత సద్గతి పొందిన మనిషికి మరుజన్మ ఉండదు. ఆ లక్ష్యాన్ని అందుకొనడానికి ప్రయత్నించడమే ఈ ఆటలోని ముఖ్యోద్దేశం. మనం జీవితంలో ఏ పనులు చేస్తే మనమా లక్ష్యానికి దగ్గరగా వెళ్తామో ఆ ఉన్నతిని సూచించే నిచ్చెనల గళ్ళలో వ్రాసి వున్నాయి. అవి వరుసగాఇలా వున్నాయి..:
సుగుణం ...సాలోక్యానికి, సత్ప్రవర్తనము... గోలోకానికి, నిష్ఠ ... తపోలోకానికీ, యాగము... స్వర్గలోకానికీ , భక్తి.... బ్రహ్మ లోకానికీ, చిత్తశుద్ధి ...మహా లోకానికీ, జ్ఞానము.. కైలాసానికీ, సోపానాలుగా ఉన్నట్లు చూడగలం. అక్కడకు చేరిన తరువాత ఇక జన్మరాహిత్యం, ఈశ్వరత్వం తో కూడిన పరమపదాన్ని చేరటానికి మన వంతు వచ్చేవరకూ       (అంటే సరైన పందెం పడేవరకూ..)ఎదురు చూడడమే. అలాగే  అంతవరకూ పోయిన పిదప మత్సర్యమూ, అహంకారం దరి చేరామా మ్రింగడానికి పాము సిద్దంగా వుంటుంది. అది మనల్ని పుణ్య హీనులుగా చేసి రాక్షసులను, హీన జన్ములుగానూ  చేస్తుంది. 
ఈ మొత్తం త్రోవలో మనం మనలోని పాముల లాంటి అవలక్షణాలను ఎన్నో దాటుకొని రావలసి వుంటుంది. అవి  మన లోనే వుండక్కరలేదు. ఆ లక్షణాలు కలిగిన రాక్షసుల దరి చేరినా అధోగతి ( పాము మింగి క్రిందకు పడిపోతాం) పట్టక తప్పదు.  
ఈ రకంగా సత్య పథం లో ప్రయాణించి, పరమపదాన్ని చేరే మార్గానికి ఈ పటం ఒక 'సూచిక' గా మనం అన్వయించుకోవచ్చు. 
 ఇదే ఆట పాశ్చాత్య శైలిలో :
ప్రక్కన చూపిన రెండో బొమ్మ చూడండి. ఇది ఇంగ్లీషులో వుంది. చాలా పాతది అనుకుంటాను. దీనిలో కూడా పైన చెప్పిన మన పరమపద సోపాన పటం లగే వుంది. మనిషి యొక్క ఉన్నతికి, పతనానికీ దోహదం చేసే లక్షణాలను నిచ్చెనలూ, పాముల రూపం లో చూపించారు. చిన్నపిల్లలు / పెద్దవారు ఆడుకొనే ఆటలో ఎన్ని విశేషాలు జతచేసారో చూడండి.

ఈ ఆట మొదట ఎక్కడ / ఏదేశంలో మొదలైందో తెలీదు. అయితే ఇప్పుడు 'స్నేక్స్ అండ్ లేడర్స్' మాత్రమే కనిపిస్తున్నాయి. పిల్లలు కూడా డైస్ తో ఆడుతున్నారు. గవ్వలతో ఎవరూ పెద్దగా ఆడటం లేదు. 'అష్ట - చమ్మ, 'పులి మేక', లాంటి సంప్రదాయ క్రీడలు, వాటి రూపకల్పనలో దాగివున్న జీవితానికి పనికి వచ్చే నీతి సూత్రాలు లేదా సిద్ధాంతాలు మరుగున పడిపోతున్నాయి.
అలాంటి పాత / సంప్రదాయ క్రీడలను వెలికి తీసుకు రావడానికి http://gamepandit.com/index.html వారు కృషి చేస్తున్నారు. చూసి ఆనందించండి.
పైన చూపిన పరమ పద సోపాన పటం బొమ్మ 
పూర్తిగా చదవండి...

Wednesday, January 11, 2012

అభ్యుదయ ఫౌండేషన్, కాకినాడ వారు నిర్వహించిన రాష్ట్ర స్థాయి సంగీత పోటీలు..

అభ్యుదయ ఫౌండేషన్, కాకినాడ వారు నిర్వహించిన రాష్ట్ర స్థాయి సంగీత పోటీలు..

కాకినాడలోని అభ్యుదయ ఫౌండేషన్ వారు ఈ పోటీలను మొదట ప్రాంతీయ కేంద్రాలలో నిర్వహించి, ఆ పోటీలలో మొదటి రెండవ బహుమతులు గెలుచుకొన్న వారికి ఈ నెల రెండవ తేదీన కాకినాడలో రాష్ట్ర స్థాయి లో పోటీలు నిర్వహించారు. శ్రీ బాదం మాధవరావుగారి ఆధ్వర్యం లో జరిగిన ఈ పోటీలు గాత్రం, వీణ, ఫ్లూట్, వయోలిన్, సన్నాయి, మృదంగం, డోలు, సాక్సోఫోన్, మాండొలిన్ మొదలైన విభాగాలలో సీనియర్స్ జూనియర్స్ కి వేరువేరుగా జరిగాయి.

సుమారు డెబ్భై మంది వరకు ఈ పోటీలలో పాల్గొన్నారు. వారందరూ హైదరాబాదు, తిరుపతి, విజయవాడ, విశాఖపట్నం మరియు కాకినాడల లో జరిగిన ప్రాంతీయ స్థాయి పోటీలలో విజేతలుగా నిలిచి ఇక్కడకు వచ్చిన వారే. అందువల్ల పోటీలు పూర్తవటానికి రెండురోజులు పట్టింది. రెండోరోజు సాయంత్రం శ్రీ మల్లాది సూరిబాబుగారు విశిష్ట అతిధిగా జరిగిన కార్యక్రమంలో మొదటి బహుమతి గ్రహీతలతో ప్రదర్శన కూడా ఇప్పించారు.


న్యాయనిర్ణేతలుగా వచ్చిన ప్రముఖ సంగీత విద్వాంసులు పోటీలు ఒకే రోజులో పూర్తవక రెండవరోజు కూడా ఉండిపోవలసి వచ్చింది.  అంతమంది చిన్నపిల్లలు..( సీనియర్స్ కూడా ఇరవై ఏళ్లకు మించని వారే కావడం విశేషం) చాలా చక్కటి ప్రతిభలనంది పుచ్చుకొని ఇలాంటి సృజనాత్మక కళా రంగాలలో రాణించడం ముదావహం. 'స్పర్థయా వర్ధతే విద్యా' అన్నారు. కాని ఈ కుర్రవాళ్ళు అందరూ చాలా sportive spirit  తో మెలిగారు. పోటీలో ఒకరు ప్రదర్శిస్తున్నప్పుడు వాళ్ళని మిగతావారు ప్రోత్సహించడం, వాద్య కళాకారులకి తాళం వేస్తూ సహాయపడడం.. చూస్తోంటే చాలా ముచ్చటేసింది.

ఇలాంటి ఆరోగ్యకరమైన వాతావరణం లో ఇంతపెద్ద ఎత్తున శాస్త్రీయ సంగీతం లో పోటీలు నిర్వహిస్తూ, దాని వ్యాప్తికి కృషి చేస్తున్న అభ్యుదయ ఫౌండషన్, కాకినాడ వారు శ్లాఘనీయులు. 

మా అమ్మాయి కృష్ణప్రియకి జూనియర్స్ విభాగంలో మొదటి బహుమతి వచ్చింది. విశాఖపట్నానికి చెందిన ప్రముఖ గాత్ర సంగీత విద్వాంసురాలు, మా శ్రీమతి కి గురువుగారు అయిన  శ్రీమతి మండ సుధారాణి గారి అమ్మాయి కుమారి ప్రత్యూష శ్రుతి రవళి కి సీనియర్స్ విబాగం లో మొదటి బహుమతి మరియు వయోలిన్ లో రెండవబహుమతి, ఉత్తమ ప్రతిభ కనబరచి నందుకుగాను బంగారు పతాకాన్ని కూడా కైవశం చేసుకొంది.  అలాగే జూనియర్స్ గాత్రం లో రెండవ బహుమతి పొందిన సువర్ణజ్యోతి (అంధ బాలిక) తన వైకల్యాన్నితన ప్రతిభతో అధిగమించి శభాష్ అనిపించుకొంది. మృదంగం లో జూనియర్స్ మొదటి బహుమతి పొందిన చిన్నారి కార్తికేయ అపర నందీశ్వరుడే అనిపించుకొన్నాడు. జూనియర్స్ వయోలిన్ లో మొదటి బహుమతి పొందిన హైదరాబాదు కి చెందిన శ్రీవత్స తొమ్మిదవ తరగతి చదువుతున్నాడట. తొమ్మిదేళ్ళ నుంచీ నేర్చుకొంటున్నాడట. సీనియర్స్ కి దీటుగా వాయించాడు.

వీరందరికీ ఆ సరస్వతీ దేవి కటాక్షం సంపూర్ణం గా లభించి భవిష్యత్తులో ఉత్తమ కళాకారులుగా ఎదిగి మన తెలుగువారికి  గర్వకారణం ఔతారని ఆశిద్దాం. 




పూర్తిగా చదవండి...

Sunday, January 8, 2012

అమూల్ బేబీ సృష్టికర్త శ్రీ యూస్టేస్ ఫెర్నాండెజ్..

Eustace Fernandes
Eustace Fernandes
                                     మన దేశం లో వ్యాపార ప్రకటనలు చాలానే వచ్చినా అందరికీ సదా గుర్తుండే ప్రకటనలలో అముల్ డైరీ వారి 'అమూల్ పాపాయి' ప్రకటన తప్పకుండా వుంటుంది. దానికి వచ్చిన ఆదరణ అంతా ఇంతా కాదు. చక్రాల్లాంటి కళ్ళతో చుక్కల గౌను తో బొద్దుగా కనిపించే ఆ అల్లరిపిల్లకి ఇప్పటికి సుమారు నలభై అయిదు  సంవత్సరాల వయసు. She is  all set to enter the Guinness Book of World Records for being the longest running campaign in the world. 

సమకాలీన సంగతులని, వార్తలనీ వ్యంగ్యంగా చూపిస్తూ అమూల్ వెన్నకి ప్రచారకర్తగా వున్నఆ చిట్టితల్లికి దేశమంతా అభిమానులున్నారనటంలో సందేహం లేదు. ముఖ్యనగారాల్లోని ప్రధాన కూడళ్ళలో పెద్దపెద్ద బిల్ బోర్డ్స్ ని ఆగి చూసి మరీ వెళ్తారు చాలా మంది. 

అంత ప్రాచుర్యం పొందిన ఈ మస్కట్ రూపకర్త శ్రీ యూస్టేస్ ఫెర్నాండెజ్  1966  లో రూపొందించారు. భారతదేశంలో  క్షీరవిప్లవానికి మూల పురుషుడు, పాల సహకార ఉద్యమ నిర్మాత ఐన శ్రీ వర్ఘిస్ కురియన్ ఆధ్వర్యంలో చిన్నగా మొదలైన కైరా జిల్లా సహకార పాల ఉత్పత్తిదారుల సంఘం బాగా అభివృద్ధి చెందింది. ఇతర సంస్థల ఉదారమైన సాయం లేకుండా తమంత తాముగా భారతదేశంలో మొట్టమొదటి ఆధునిక పాల ఉత్పత్తుల కేంద్రం నెలకొల్పే స్థాయికి చేరింది. గుజరాత్ లోని ఆనంద్ అనే గ్రామంలో ' ఆనంద్ మిల్క్ యూనియన్ లిమిటెడ్'(దీని సంక్షిప్త నామమే 'అముల్') గా ఆవిర్భవించి జవహర్ లాల్ నెహ్రూ చేతుల మీదుగా ప్రారంభించబడింది. అమూల్య అనే సంస్కృత పదానికి సమానార్ధం గా మరియు ఆనంద్ పాల ఫ్యాక్టరీ లో తయారయ్యే ఉత్పత్తుల నాణ్యత, స్వచ్ఛత లకు ప్రతిబింబంగా పెట్టిన 'అమూల్' బ్రాండ్ నేమ్ కి అంతే దీటుగా ఈ మస్కట్ కూడా రూపొంది అంతే పేరు తెచ్చుకుంది.


భారతదేశ అడ్వర్టైజింగ్ రంగానికి విశేషమైన సేవలందించి, లిమ్కా, LIC వంటి సంస్థలకి లోగోలూ, వ్యాపార ప్రకటనలూ రూపొందించిన శ్రీ ఫెర్నాండెజ్ గారు తన డెబ్భై అయిదవ ఏట కాన్సర్ తో పోరాడుతూ 2010మార్చి పదవతేదీ న మరణించారు. కింద వున్న వారి ఇంటర్వ్యూ లలో కొన్ని ఆసక్తి కరమైన అంశాలు వున్నాయి. క్లిక్ చేసి బొమ్మ పెద్దది చేసి చదవవచ్చు.


వారి ఫేస్ బుక్ ఎకౌంటు కి లింక్:
Eustace-eusfull-Fernandes 


Amul girl ads on Face book link 1
Amul girl ads on Face book link 2

Advertising Ka Kamaal...(Amul ads)

పై లింక్ మీద నొక్కి మరిన్ని ads చూడండి.


అయ్యా.. పైకి చిన్నపిల్లలా కనిపిస్తున్నా ఈవిడకి నలభై అయిదేళ్ళు. వారానికి ఒక కార్టూన్ ad అనుకుంటే 2300  పైన బొమ్మలుంటాయి. కనీసం పదిరోజుల కొకటను కున్నా సుమారు 1650. అంచేత ఇంకా ఓపిక వుంటే ఇదికూడా చూడండి:

నేను సేకరించిన సుమారు ఒక అరవై అడ్వర్టైజ్మెంట్ లు  (లింక్ నొక్కండి)
పైన ఇచ్చిన లింకులన్నిటి సొంతదారులకీ మనఃపూర్వక ధన్యవాదాలు. 
పూర్తిగా చదవండి...

మరిన్ని చక్కటి వెబ్ సైట్లు..!!

telugu (బ్యానర్ పై నొక్కి వెబ్ సైట్ కి వెళ్ళండి.)